Col 3 | ASO | STEP | Nemu' nene Kilisito' hilinguti' O'moso'mo do ote-dingu' nene lengikisi lutine helavo minanguti' nene maka' do ote-lengedavo nizani' nenako nemu' nene lingine Kilisito' O'mosoloti' lemo mino ana hulaa' ida neida Okulumoku' minine' monovo danavavo' nene dalone li gili mini gono di minilo.

Colossians 3

Lingine Nene Kilisitolesi Hiliisa Lutine Hele Neinguti' Nene Kilisitolesi Gohi Oti Minevo' Alevo' Igi Nizani' Nenako Lengemeni Dameni Litehelo' E'metami Lengemeni Dameni Gosohoto' Nene E'meti Igi Mili Minilizave Lo Paulo' Lo-ngimine' Gamazi

1 Nemu' nene Kilisito' hilinguti' O'moso'mo do ote-dingu' nene lengikisi lutine helavo minanguti' nene maka' do ote-lengedavo nizani' nenako nemu' nene lingine Kilisito' O'mosoloti' lemo mino ana hulaa' ida neida Okulumoku' minine' monovo danavavo' nene dalone li gili mini gono di minilo. 2 Me misubou' minine' initeto' nene lutine milami asi Okulumokuko neine' monovo danavalokovo' nene lutine mili gili minilo. 3 Ne'mine noluvoni' nene neemu' noluve: Lingine hili nizani' gelavosa minevo' alevotine gihile nene Kilisitongu' haleke neine' nene mo O'mosola neive. 4 Ne neiha minevo' alevotine'mi izeleho Kilisito' ogo soto' pizeline' nene linginesi a'mine'mine igi lengemeni dameni okodine atoli'minesi maka' soto' ilisave.

5 Nemu' nene lingine me misubou' monovo danava goloso lutingu' neine' ado' vene' vemoho' gipe alu gopo ingaa' monovosi ido' lute do goloso iline' monovo ato ato' nesi ido' inite' goloso mamu' lutine otavo ninge lamine' oga' nesi ido' inite' gohi masi masi dunivoo lii mumuzo' oga' monovo nene soza o'mosolo' gelekele' oga' monovo ne'mine nenaze a'mine nesi nene mo ngibili hilani' gelavo mudise hulisa minilo. 6 O'moso'mi gamazi gili huli ne'mine monovo igi mili iga' avemu' nene O'moso izebolo' molavo lihime ngemeleseive. 7 Ido' linginesi gomu' a'mine ne'mine monovo nene lengi' lutine'mine lolo' ogavo minangu' nene a'mido' e'meti igi mili minaa' ani' ma neive. 8 Ne'mine igi minani'za idise a'mine nene hulisa ma me'mine monovo nesi nene hulilo: Ado' lingizebolo' mala' mala' nesi ido' evene' singehe' goloso minaa' nesi ido' lukehe lakehe oga' monovo nesi ido' dovo ledevoka laa' monovo nesi ido' gamazi goloso laa' nesi nene mo mudise hulilo. 9 Lengiku' gamazi lilizangu' nene sozasi lamilo. Lingine gomu' lengemeni damenisi ido' a'mine'mo ogo molo oga' ine' monovo've golososi nene di hulisa 10 lengemeni dameni gosoho' di otuhani' ma neive. A'mine lengemeni dameni nene O'moso'mo lingine eikumu' gili vevesi osu' li minilizangumu' ve lo ei' a'mine lengemeni dameni do soto' ive'mi avazahalo' gehepeve nene gohi do gosoho' o'mo voovo' neive. 11 Ido' ne'mino do gosoho' o-lidingu' mene gomu' ho'lo ato ato' minune' monovo ma nene mo mudise osu' laave. Ado' evene' linge ma nene heta ato' aleve nGiliki aleve nevo'mine minavo linge ma Zuda aleve minunivo ne'mo ho'lo minune' nolihe ido' linge ma okodela O'moso'mi noso neivo linge ma nomivo haza nizavoo minune' nolihe ido' linge ma nene save dunive ne'mine nonivo linge ma nene save damave evene' loposo ne'mine minavo minune' nolihe ido' linge ma goboni ve minavo linge ma nene evene' maliti goboni ve minamo haza nonivo minune' nolihe laza ne'mino minaa' une' ma nene idise Kilisito' aza leli' mukiliti nabate lolo' ogo leli' nene mukiku' mine molo neine' nenako nemu' nene ne'mino ho'lo minaa' une' monovo ma nene mo osu' lave.

12 Ne'mino neine' nenako nemu' nene lingine O'moso'mo lengi' nene do kegeso do eita ogosa lulo lengeme neive ei' evenele nizani' nenaze. Lingine me'mine monovo nene di otuhi igi mili minilo. Ado' muludine hukavo evene' mulumo'ine ningaa' monovosi ido' nasahili' o-ngedaa' monovosi ido' okode do lemo minaa' monovo nesi ido' muludine laminekisi hongu lo minaa' monovo nesi ido' lingizebolo' molani' inite' ikevo ma goloso gelamo zou lo minaa' monovo nesi nene di otuhi 13 lengiku' evene' malite lingizebolo' molali inite' i-lingidika' i-lingidika' navo ma nemu' nene gosele' lengebelamivo gili huli a'mine lihime'ine nene huli-ngidilo. Ee, Guvelesi ve'mo lengi' lihimetine nene hulo-lingidine' nenaze. A'mine'mine igi lingine nene ge lihimeka hulo-gede ne lihime'ne hulo-nede livo' minilo. 14 Ido' lingine ne'mine mana'mine inite' igi mili minaa' naani' nene ngivile' ivosa inite' naba nene lutine ngemaa' monovo nene di otuhi igi mili minilizave. A'mine lute ngemaa' monovo ne'mo nene monovo lamine' muki' nene asabu' ize neivosa laminovo' minelonido' do hamo' o-ledaa' neive. 15 Kilisito' elese molo-lengedo lengele'mize eita ine' nene lingine lutine hamo' ogavo hongu li laminivo' minilizave losa ne'mine ine' nenaze. Lingine ne'mine mana'mine inite' ilisa gilii ma nene gomu' a'mine initekumu' ize' mili di ningi Kilisitodati' hongu lo lamino minaa' monovolo' nene e'metilizani' aka vele-lengedeline' initekovo' ilo. Ne'mine igi mini O'moso isaa' neve li opo'ni li minilo. 16 Kilisito' gamazi've nene lutingu' vauve goloso elosa mine molo minivo minilo. Ne'mine igi otohato gamazi gehepeve li ge apize neme ne apize geme ido' ge hungo' molo neme ne hungo' molo geme lisa mono' nama ato ato' mono' godolouti' mono' nama nehe idise a'mene laa' naani' mono' nama nehe ido' O'moso'mi Sikalahu' ne'mo lo soto' ogo lo-lengemeline' mono' nama nehe neeve nene li O'moso nene isaa' neve li a'mine nama nene lutinguti' gehepeve li-imaa' igisa minilo. 17 Lingine gono dalizangu' nehe gamazi lilizangu' nehe nadi' nadi' ilizahe a'mingu' nene Izesu' aza lengi' Guvetinesi ve miningumu' nene soto' ogo minelido' di milisa igi mili ei' Izesu'nimu' nene melehine O'moso isaa' neve li-di minilo.

Vene' Vemoho' Engikisi Izipaha'inesi Ize'ninge Me'ningesi Ido' Gonou' Vesi Gizebo Ve'inesi Ingine Igi Mili Iliza Monovomu' Paulo' Lo-ngimine' Gamazi

18 Lingine Guvelesi ve'mi evenele nizanako nemu' nene vene' lengi' nene vadinge lilizani' gamazilo' nene gelekele' igi gili daakovo' igi minilizado' o neine' nenaze. Gelekele' i-ngidi minilo. 19 Ido' vemoho' lengi' nene eledingine lutine ngimi mini gosele' ngebeleline' inite' i-ngidamilo. 20 Ido' izipe lengi' nene izetingine metingine gelekele' i-ngidi minilizani' nene Guvelesi ve'mo gilivo mulunou' lamine' oloseize. Gamene gamene gelekele' i-ngidivo' minilo. 21 Ido' ize'ninge me'ninge lingine izipahatine gosele' ngibilivoovo' minikelizaze. nGizebolo' molali inite' inite' i-ngidi minamilo. 22 Ido' gonou' ve lingine nene me misubouko gizebo i-lingidaa' naavetine nene gamene gamene gelekele' i-ngidivo' minaa' ilo. Ido' ne'mini gelekele' i-ngidilizani' nene lengi' gizebo vetinelite lengikumu' ningi lamine' gililizave li engi' ve'nido' nene gono amuzo mili daa' naave gili gono di miniisa alinge' ingine ningamavo gono gilizevo igi di minaa' ne'mine nene amii asi Guvelesi vemu' golise gili mini lutine gonotidokovo' mili mini gono di minilo. 23 Ne'mine mana'mine gono dalizangu' nene eveneliti gono di-ngidamii asi Guvelesi ve'mi gono nidi-dani' gilivosa lutine laminetoti' gehepeve nene di minilo. 24 Ido' ne'mine ilizani' nene Guvelesi ve'mo a'mine gonotido' golo hizo salani molo-lidine' inite' nene menitine ne'mine lehize-lengedeline' mamu' nene gili nizani' nenako nemu' nene ne'mine ilisaave. Lingine gelekele' i-di nizave nene Guvelesi ve Kilisito'ni gelekele' i-di nizani' ve. 25 Ido' ne'mine noluvoni' nene ingine gamazi've avuto' igi monovo goloso ilizave nene hamokisi vo'nelo' ve ve lo ma ninge mate-ngedamo muki' nene monovo goloso ilizado' golo hizo lihime ngeme osu' loloseive.